សៀមរាប៖ ប្រធានអាស៊ានស្នើឱ្យរួមគ្នាឆ្លើយតបឱ្យបានទាន់ពេលវេលាចំពោះនិន្នាការថ្មីៗដើម្បីជំរុញឱ្យមានការរៀបចំក្របខណ្ឌជាសកលសម្រាប់ពាណិជ្ជកម្មអន្តរជាតិ ក៏ដូចជាការបម្រើឱ្យផលប្រយោជន៍គ្រប់ប្រទេសទាំងអស់ប្រកបដោយតម្លាភាពនិងគ្មានការរើសអើង។

ថ្លែងក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ នៅទីក្រុងសៀមរាបខេត្តសៀមរាប នាព្រឹកថ្ងៃពុធ ទី១៤ ខែកញ្ញានេះ សម្ដេចតេជោ ហ៊ុន សែន បានលើកឡើងថា បញ្ហាសំខាន់មួយទៀត ដែលអាស៊ានត្រូវគិតគូរបន្ថែម គឺការឆ្លើយតបឱ្យបានទាន់ពេលវេលាទៅនឹងនិន្នាការថ្មីៗក្នុងការកសាងពាណិជ្ជកម្មសកល។

ក្នុងនោះ សម្ដេចឱ្យដឹងថា វិធីសាស្ត្រដើម្បីទទួលបានការឆ្លើយ តបឱ្យបានទាន់ពេលវេលា នោះគឺវាតម្រូវឱ្យអាស៊ានរួមគ្នាជាធ្លុងមួយដើម្បីសម្របសម្រួល និងជំរុញឱ្យមានការរៀបចំក្របខណ្ឌជាសកលសម្រាប់ពាណិជ្ជកម្មអន្តរជាតិ ដែលបម្រើឱ្យផលប្រយោជន៍គ្រប់ប្រទេសទាំងអស់ប្រកបដោយតម្លាភាព និងគ្មានការរើសអើង។

គួរឱ្យដឹងថា កត្តាដែលកំពុងជំរុញឱ្យមាននិន្នាការឆ្ពោះទៅរកការធ្វើពាណិជ្ជកម្មក្នុងគន្លងថ្មីក្នុងតំបន់និងក្នុងពិភពលោកនេះ គឺបណ្ដាលមកពីវិបត្តប្រេងឡើងថ្លៃ អត្រាអតិផរណាខ្ពស់ បរិស្ថាន ការបម្រែបម្រួលអាកាសធាតុ និងជំងឺឆ្លងរាតត្បាតជាដើម។

ជាមួយគ្នានេះ នាយករដ្ឋមន្ត្រី សម្ដេចតេជោ ហ៊ុន សែន និងជាប្រធានអាស៊ាន បានបង្ហាញការជឿជាក់ថា អាស៊ាននឹងបន្តធ្វើដំណើរទៅមុខប្រកបដោយភាពរឹងមាំ សាមគ្គីភាព និងមិត្តភាពដើម្បីជម្នះរាល់បញ្ហាប្រឈមនានា និងការកសាងសហគមន៍អាស៊ានស្របតាមស្មារតីស្នូលរបស់អាស៊ានគឺ ចក្ខុវិស័យមួយ អត្តសញ្ញាណមួយ និងសហគម៍តែមួយ។

ជាចុងក្រោយ សម្ដេចក៏បានថ្លែងអំណរគុណដល់សមាជិកអាស៊ានទាំងអស់ដែលបានអញ្ជើញចូលរួម ក៏ដូចជាការបន្តគាំទ្រយ៉ាងពេញលេញដល់កម្ពុជាក្នុងតួនាទីជាប្រធានអាស៊ានឆ្នាំ២០២២។ ក្នុងនោះសម្ដេច ជូនពរឱ្យដំណើរការនៃកិច្ចប្រជុំរដ្ឋមន្រ្តីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធនេះ ប្រព្រឹត្តិនិងដំណើរការទៅដោយជោគជ័យផងដែរ៕

^{PHOTO: EAC NEWS}